fanamasinana ny trano amin'ny epifania

Fitaovana ilaina: Lakre voahasina sy rano voahasina. Afaka mitondra lakre any am-piangonana ianao ny alahady alohan'ny Epifania dia mangataka an'i Mompera hanamasina azy. Raha efa misy azo angalana rano voahasina moa ao ampiangonana dia afaka maka na mitondra rano hohamasinin'i Mompera.

Andro anaovana azy: Ny andro hankalazana ny Epifania na ny 6 Janoary.

Vavaka:

(Ny pretra na lohan'ny fianakaviana no mpitarika)

Mpitarika: Fiadanana ho an’ity trano ity.

Rehetra: Ary amin'izay rehetra monina eto.

Mpitarika: Avy tany atsinanana no nisy Magy nankany Betlehema mba hiankohoka eo anatrehan’ny Tompo; ary rehefa nosokafany ny vata, dia nanolotra fanomezana sarobidy Azy izy ireo: volamena ho an’ilay Mpanjaka lehibe, emboka manitra ho an’ilay tena Andriamanitra, ary miora ho famantarana ny fandevenana Azy.

REHEFA MANAO NY MAGNIFICAT NY REHETRA, DIA AFAFY NY EFITRA NY RANO VOAHASINA.

Rehetra: 

Mankalaza ny Tompo ny fanahiko, ary faly sy ravo amin'Andriamanitra Mpamonjy ahy ny foko, fa notsinjoviny ny fiambanian'ny ankizivaviny. Fa indro, hatramin'izao, dia hataon'ny taranaka rehetra hoe, sambatra aho, satria efa nanao zavatra lehibe tamiko ilay Mahefa. Ary masina ny anarany, sady amin'izay matahotra azy hatramin'ny taranaka fara mandimby ny famindram-pony. Nahefa asa mahery tamin'ny sandriny izy: dia nampihahafiny izay niavonavona tamin'ny fisainan'ny fony; naongany hiala tamin'ny fiketrahany ny mpanapaka, fa ny ambany kosa nasandrany; ary ny noana novokisany soa, fa ny mpanan-karena kosa, dia nampodiny mitondra tànam-polo. Niahy an'Israely mpanompony izy, fa tsy hadinony ny famindram-pony tamin'i Abrahama sy ny taranany mandrakizay, araka ny efa voalazany tamin'ny razantsika.

Voninahitra anie ho an'ny Ray sy ny Zanaka ary ny Fanahy Masina. Tahaka ny teo aloha sy ny ankehitriny ary mandrakizay. Amena

Rehetra: Avy tany atsinanana no nisy Magy nankany Betlehema mba hiankohoka eo anatrehan’ny Tompo; ary rehefa nosokafany ny vata, dia nanolotra fanomezana sarobidy Azy izy ireo: volamena ho an’ilay Mpanjaka lehibe, emboka manitra ho an’ilay tena Andriamanitra, ary miora ho famantarana ny fandevenana Azy.

Mpitarika: Rainay any an-danitra, hohamasinina anie ny Anaranao, ho tonga anie ny Fanjakanao, ho tanteraka anie ny sitraponao ety an-tany, tahaka ny any an-danitra. Omeo anay anio ny haninay isan’andro, avelao ny fahotany, tahaka ny amelanay izay nanao ratsy taminay, aza avelanao ho azon’ny fitaoman-dratsy izahay,

Rehetra: Fa manafaha anay amin’ny ratsy. Amena.

Mpitarika: Ho avy avokoa ny avy any Seba

Rehetra: Mitondra volamena sy emboka manitra. 

Mpitarika: Tompo ô, henoy ny fivavako.

Rehetra: Ary aoka ho tonga Aminao ny fitarainako.

Mpitarika: Aoka isika hivavaka. Andriamanitra ô, izay naneho ny Zanakao Lahitokana tamin’ny Jentilisa tamin’ny alalan’ny fitarihan'ny kintana androany, dia omeo famindram-po mba ho tonga amin’ny fahitana ny fiandriananao be voninahitra koa izahay izay mahafantatra Anao amin’ny finoana. Amin’ny alalan’i Kristy Tompontsika. Amena.
Mpitarika: Aoka isika hivavaka. Mahiratà, mahiratà, ry Jerosalema ô, fa tonga ny fahazavanao, ary ny voninahitry ny Tompo efa miposaka aminao - Jesoa Kristy naterak'i Maria Virjiny.

Rehetra: Ary ny jentilisa handeha amin’ny fahazavanao, ary ny mpanjaka ho amin’ny famirapiratan’ny fisandratanao, ary ny voninahitry ny Tompo miposaka Aminao.

Mpitarika: Aoka isika hivavaka. Tahio, ry Tompo Andriamanitra Tsitoha, ity tokantrano ity, mba hisy fahasalamana, fahadiovana, herin’ny fandresena, fanetren-tena, hatsaram-panahy, famindram-po, fahatanterahan’ny lalànao, fisaorana an’Andriamanitra Ray sy ny Zanaka ary ny Fanahy Masina. Ary enga anie izany fitahiana izany hitoetra amin’ity trano ity sy amin’izay rehetra monina eto. Amin’ny alalan’i Kristy Tompontsika. Amena.

charlie & katie are

Rehefa vita ny vavaka dia soratana eo ambonin'ny tolanam-baravarana ny Taona sy ny litera voalohan'ny anaran'ireo Majy telolahy, toy izao:

20 + C + M + B + 23

Ny anaran'ireo Majy telo lahy dia Caspard, Melchior sy Balthazar. Ireo litera telo ireo ihany koa dia manafohy ny teny latina hoe "Christus Mansionem Benedicat" izay midika hoe: "Ry Kristy mba hamasino ity trano ity."  

Tetezina ny efitra rehetra ary hafafy ny rano voahasina. 

Twitter
Facebook
Instagram